31.12.2015
Жаңа жылдарыңызбен!
Жаңа жылым, жаңа айым, ақ берен,
Жаңа жылым, келді бірге бақпенен!
Төрт түлігім түгел болып жерімде,
Арылмасын дастарқаннан ақ деген!
Жаңа жылым, жарқын жүзді жандарым,
Жаңа жылым, әрбір атқан таңдарым!
Үміт артқан болашаққа ақ жарқын,
Сөнбесінші әр үйдегі шамдарың!
Құрметті достар!
Жарқын және көңілді мереке Жаңа жыл келе жатыр! Осы жыл сіздерге мол бақыт, табыс, қуаныш, мейірім мен жақсылық әкелсін. Қанық бояуларымен өмірге сән беріп, сүйінші хабарлар мен қызық-қуанышқа толы болсын.
Сіздердің шаңырақтарыңыздан береке, денсаулық пен бақыт кетпесін. Жақын адамдарыңыздың мейірімі мен махаббаты ең қиын сәттерде жүректеріңізге жылу берсін!
Жаңа жыл ең бағалы, ең асылды ғана тарту етсін! Жаңа жылдарыңызбен!
30.12.2015
«Қазақ тілін оқытуда әдіс-тәсілдерді тиімді пайдалану арқылы студенттердің білім сапасын арттыру» тақырыбындағы дөңгелек үстел
2015 жылғы 23 желтоқсан күні Петропавл темір жол көлігі колледжінде «Қазақ тілін оқытуда әдіс-тәсілдерді тиімді пайдалану арқылы студенттердің білім сапасын арттыру» атты дөңгелек үстел өтті.
Дөңгелек үстелдің жұмысына техникалық және кәсіптік білім беретін мекемелердің қазақ тілі мен әдебиеті оқытушылары, білім саласындағы әдістемелік жұмыс және ақпараттық технологиялар орталығының әдіскері Г.М. Набиева қатысты.
Баяндама жасағандар:
1. Оқытушы Д. Ж. Ақышова, «Қазақ тілі сабағында деңгейлеп оқыту технологиясын қолданудың тиімділігі»;
2. Оқытушы А. С. Оспанова, «Кәсіби қазақ тілін оқытуда жаңа технологияларды қолдану арқылы студенттердің кәсіптік құзыреттілігін қалыптастыру»;
3. Оқытушы Р. С. Жамулдинова, «Студенттердің білім сапасын жетілдіру үшін мемлекеттік тілде іс қағаздарын жүргізуді оқытудың тиімді әдістерін қолдану»;
4. Оқытушы Ж. С. Мусина, «Студенттердің жеке және кәсіби тұрғыдан қазақ тілін үйренуге қызығушылықтарын қалыптастыру».
16.12.2015
«Тәуелсіздіктің ұландары» атты ұлттық тарих сағаты
2015 жылғы 15 желтоқсан күні Петропавл темір жол көлігі колледжінде кітапхана меңгерушісі Г.М. Қабденова Қазақстан Республикасының тәуелсіздігіне арналған «Тәуелсіздіктің ұландары» атты ұлттық тарих сағатын өткізді.
Іс-шараны өткізуге ДМ-11 (сынып жетекшісі К. Ж. Нашарбаева), Д-11 (сынып жетекшісі Е. Ф. Баймышева) топ студенттері қатысты.
Қатысушылар 16 желтоқсан күні біздің еліміз басты ұлттық мереке - Қазақстан Республикасының Тәуелсіздік күнін атап өтетіндігін айтып өтті. Бұл күн жаңа тарихқа бастама берді: өткен 24 жыл ішінде әлем аренасына тұрақты, экономикалық қуатты, қарқынды дамып келе жатқан мемлекет шықты, ал оған арқау болған бейбітшілік, тұрақтылық және қоғамдық келісім. Қысқа уақыттың ішінде егемен республика халықаралық қоғамдастықтың тең құқылы мүшесіне айналып, дамыған елдермен тығыз байланыс орнатты. Бұлардың барлығы – Ұлт Көшбасшысы Н.Назарбаевтың салиқалы дана мемлекеттік саясатының нәтижесі.
Қазақстан дамудың жаңа жолына түсіп, өз мәдениетін, тілін, діні мен салт-дәстүрлерін өркендетуге мүмкіндік алды. Бүгінгі таңда республиканың әр азаматы өз тәуелсіздігін мақтан тұтады.
Іс-шараны өткізу барысында Қазақстанның тәуелсіздікке келген жолы көрініс тапқан слайдтар, «Қазақстан Республикасының Гимні» бейнебаяны көрсетіліп, «Домбыра», Б. Тілеуханның «Елім менің» аудио сүйемелдеуі орындалды. Кітапхананың оқу залында «Бірыңғай Қазақстан» атты кітап көрмесі ұйымдастырылды.
16.12.2015
Тәуелсіздік күні
Құрметті әріптестер!
Қазақстан Республикасының Тәуелсіздік күніне орай жүрекжарды құттықтауларымызды қабыл алыңыздар!
Тәуелсіздік күні – қазіргі Қазақстанның ұлттық мерекесі. Ол жаңа егемен және тәуелсіз ел – Қазақстан Республикасының өмірге келген күнін белгілейді.
Сіздерге бейбітшілік, бар жақсылықты, әл-ауқаттың артуын және еліміздің игілігі үшін биік белестерді бағындыруды тілейміз. Әр күндеріңіз жемісті болып, әр ісіңіз біздің шаңырағымыздың бақытты болашағына мызғымас кепілдік берсін.
Сіздерге және сіздердің жақындарыңызға бақыт, денсаулық және өркендеу тілейміз!
11.12.2015
«Біз сайлаушылармыз» іскерлік ойыны
2015 жылғы 11 желтоқсан күні Петропавл темір жол көлігі колледжінде «Темір жол жылжымалы құрамдарын пайдалану, жөндеу және техникалық қызмет көрсету» мамандығы екінші курс студенттерінің арасында «Біз сайлаушылармыз» атты іскерлік ойыны өткізілді.
Аталған іс-шара Әлеуметтік-экономикалық пәндер апталығының шеңберінде ұйымдастырылған болатын. Ойын қорытындылары бойынша бірінші орынды Л-21 топ, екінші және үшінші орынды В-21 және В-22 топ командалары иеленді.
