27.03.2017
Талапкерге-2017!
Петропавл темір жол көлігі колледжі 2017-2018 оқу жылына қабылдау туралы хабарлайды.
Толығырақ ақпаратпен ОСЫ САЙТТА таныса аласыздар.
22.03.2017
Наурыз мерекесімен!
О, Жаратқан халқыма жігер берші,
Қыдыр ата, бақ тілер, асыл елші.
Қан жүгіріп құлпырған мына әлемге
Байтақ елім құт қонып, еркін енші.
Жыл басталды – Ұлыстың ұлы күні!
Қымбатты достар!
Сіздерді Наурыз мерекесімен шын жүректен құттықтаймыз. Келген көктем, жарқын Наурыз мерекесі сіздердің үйлеріңізге молшылық әкеліп, әл-ауқатты арттырсын, ең асыл тілектеріңізді қабыл етіп, ойлаған жоспарларыңыздың табысты орындалып, мақсаттарыңызға жетуге көмектессін.
Ең батыл шығармашылық ойларыңыздың жаңа бастамаларына шабыт, қуат, олардың тез арада іске асуын тілейміз.
18.03.2017
«Наурыз – достық мерекесі» сазды-поэзия сағаты
2017 жылғы 17 наурыз күні Петропавл темір жол көлігі колледжінде кітапхана меңгерушісі Г.М. Қабденова «Наурыз – достық мерекесі» сазды-поэзия сағатын өткізді.
Іс-шараны өткізуге Т-11 топ (сынып жетекшісі И.А. Сергеева), ДМ-11 топ (сынып жетекшісі А. М. Устинов), ПО-31 топ (сынып жетекшісі В. В. Кревень) қатысты.
Қатысушылар Наурыз – табиғаттың жаңару мерекесі, жаңа жыл, жаңа өмір, көктемнің оянуы екенін, сондай-ақ мереке жалпы адамзаттық құндылықтарды белгілеп, республика халықтарының арасында достық пен бауырмалдықты нығайтып, көне дәстүрлерді жаңғыртатынын жеткізді. Қазіргі Наурыз бұрынғы дәстүрлер сабақтастығын сақтап қалған және ұлттық мәдениетті жаңғырту жағдайында ол «заманалар жалғастығының», Қазақстан тарихы мен бүгінгі күнінің маңызды буыны болып табылады.
Іс-шараны өткізу барысында поэзия жолдары оқылды. Интербелсенді тақтада «Праздник Наурыз в Казахстане» бейнефильмі, «Наурыз» әнінің бейнебаяны, слайдтар көрсетілді.
Оқу залында «Ұлы Наурыз мерекесі» кітап көрмесі ұйымдастырылды.
18.03.2017
Жалпы гуманитарлық пәндер циклінің апталығы
2017 жылғы 13 наурыздан бастап 18 наурызға дейін Петропавл темір жол көлігі колледжінде Наурыз мерекесіне орайластырылған Жалпы гуманитарлық пәндер циклінің апталығы болып өтті. Байқаулар, сынып сағаттары, сазды кеш өткізілді.
2017 жылғы 13 наурыз күні бірінші және екінші курс студенттерінің арасында көктем мерекесіне арналған плакаттар байқауы ұйымдастырылып, олардың қорытындылары бойынша жүлделі І орынды Т-11 топ, II орынды – Э-11 және Б-21 топ, III орынды – ДМ-11 және Л-22 топ иеленді.
2017 жылғы 14 наурыз күні ұлттық ойындар (Асық ойнау және Тоғыз құмалақ) бойынша сайыс өткізілді. Э-11 топ студенттері сайыс жеңімпаздары болып танылды: I орынды – А. Баян, II орынды – М. Лазарев, III орынды – Д. Падеров иеленді. Сайысты оқытушы Н. А. Бегімова өткізді.
2017 ж. 15 наурыз күні оқытушы Б. Б. Илюбаева «Наурыз аруы» байқауын ұйымдастырып, байқауда Д-12 және Т-11 топ қыздары белсенділік танытты. «Наурыз аруы» байқауының нәтижелері бойынша П. Болатбек (Т-11 топ) жеңімпаз атанып, «Біліміне ақылы сай» номинациясында – С. Штонда (Д-12 топ), «Сүйкімді ару» номинациясында – А. Митрофанова (Д-12 топ) топ жарды.
2017 ж. 16 наурыз күні оқытушы А. С. Оспанова «Қазақтың дастарханы» тақырыбында сынып сағатын өткізді. Іс-шараны өткізуге Э-43 топ студенттері қатысты. Қазақ халқының ұлттық тағамдары ұсынылған дастархан ұйымдастырылды.
2017 жылғы 17 наурыз күні «Наурыз-думан!» мерекелік кеші өткізілді. Іс-шарада студенттер мен оқытушылар көрсеткен қазақ халқының «Шашу» және «Аластау» дәстүрлерін көрермендер тамашалады. Студент ұлдар киіз үй тігіп, қыздар ішкі жасауын жасап, ұлттық нақышта дастархан жайды. «Мәңгілік ел жастары – индустрияға» - «Серпін-2050» жобасы аясында білім алып жатқан студенттер мерекені өткізуге белсенді қатысты.
2017 жылғы 18 наурыз күні оқытушы А. Қ. Қабденова «Наурыз дәстүрлері» атты сынып сағатын өткізді. Сынып сағатының барысында қазақ халқының «Шашу», «Аластау», «Босаға майлау» сияқты көркем дәстүрлері назарға ұсынылды.
13.03.2017
«Жас жауынгер» әскери-спорттық жарысы
2017 жылғы 10 наурыз күні Петропавл темір жол көлігі колледжінде «Жас жауынгер» әскери-спорттық жарысы өтіп, оған Солтүстік Қазақстан кәсіптік-педагогикалық колледжінің, М.Жұмабаев атындағы Петропавл гуманитарлық колледжінің, Солтүстік Қазақстан медициналық колледжінің және Петропавл темір жол көлігі колледжінің командалары қатысты.
Жарыстың басты міндеттерінің бірі айрықша дайындығы бар ұлдарды анықтау, сондай-ақ жыл сайын мамыр айында Петропавл қаласында орналасқан Қазақстан Республикасы Ұлттық ұланы Әскери институтының базасында өтетін әскери-қолданбалы спорт түрлері бойынша «Ұлан» спартакиадасына командалардың дайындалуы және қатысуы болып табылады.
Жарыс бағдарламасы: атыс дайындығынан, азаматтық қорғаныс және көп сатылы жарыстан тұрды. Табанды күресте 129 ұпай нәтижесімен Петропавл темір жол көлігі колледжінің командасы жеңіске жетіп, екінші орынды 107 ұпай нәтижесімен – Солтүстік Қазақстан кәсіптік-педагогикалық колледжінің командасы, үшінші орынды 100 ұпай нәтижесімен – М. Жұмабаев атындағы Петропавл гуманитарлық колледжі иеленді.
Іс-шараға ҚР ҚК ардагерлері, жауынгер-интернационалистер, Петропавл қ. ҚІБ өкілі шақырылды.
Жарыстар барысында гитараның сүйемелдеуімен әскери-патриоттық әндер орындалды.
